ပုံအာဂီုမန် ပိုဒ် ၁−၁၀

ပုံအာဂီုမန်−ဒုၚ်တၠုၚ်ရအဴ

(၁၆) သေဋ္ဌဳကဵုထဝ်ကလောံ

ပုံအာဂီုတ္ၚဲဏံမၞုံယၟု(သဆဋ္ဌဳကဵုထဝ်ကလောံ)မဒှ်ကီုရအဴ

သေဋ္ဌဳနွံမွဲတၠဂှ် ဇၟာပ်ဇၟာပ်သဝ်တ္ၚဲကၠာဟွံပၠိုတ်ဂှ်တှ်ေ ညးတေံလုပ်အာလက္ကရဴသ္ၚိတေံတုဲ သေဋ္ဌဳဂှ်အာခါဲဗဵုကျောဝ်ပ္ဍဲကတိုၚ်သၟဝ်တမ်ဆုဂှ်လၟေၚ်လၟေၚ်တ္ၚဲသဝ်ကီုရ၊ နွံမွဲတ္ၚဲဂှ်ပၠန်တှ်ေ ကောန်ဍိက်ပ္ဍဲသ္ၚိသေဋ္ဌဳဂှ်လေဝ်သံသယတုဲကၠတ်ကျောဝ်တုဲ ဆဵုကေတ်သေဋ္ဌဳဗျုဏံညးတေံအာတိုပ်လဝ်ထဝ်ကလောံသၟဝ်တမ်ဆုဂှ်ဏောၚ်သွံ၊ ခြာဟွံလအ်ဟေၚ် ထဝ်ကလောံဂှ်လေဝ်ကောန်ဍိက်ပ္ဍဲသ္ၚိသေဋ္ဌဳဂှ်ကၠတ်ကေတ်ဏာတုဲ ကၠေံအာသီုထဝ်သီုကောန်ဍိက်ရ၊ ဆဂးဂှ် ပ္ဍဲကတိုၚ်တိုပ်စွံလဝ်ထဝ်ကလောံဂှ် ကောန်ဍိက်သေဋ္ဌဳထပ်စုတ်မတၟံသ္ပစၞထဝ်ကလောံဂှ်ရ၊ ကောန်ဍိက်ဂှ်ချူစွံလဝ်မွဲတၞးသၟဝ်တမ်ဆုဂှ်တှ်ေ ၊ ယွံလေဝ်သေဋ္ဌဳ ထဝ်ကလောံသေဋ္ဌဳၜိုန်နွံမံၚ်ကီုလေဝ် သေဋ္ဌဳဟွံသုၚ်ေစောဲစကာမံၚ်ရတှ်ေ အေတၟံကလောံဏံလေဝ်စွံလဝ်စိုတ်သ္ပစၞထဝ်ကလောံတှ်ေတုဲရ။

ပုံအာဂီုဏံဝွံ ဗ္တောန်လဴထ္ၜးကဵုပိုဲကောန်ဂကူတံဟီုဂှ်တှ်ေ (ကပေါတ်နွံကဵုၚုဟ်မးပ္ဍဲပိုဲဏံဂှ် ယဝ်ဟွံသုၚ်စောဲစကာဗဂဵုလဟဵုမ္ဂးတှ်ေ မုဟွံဒှ်ကၠုၚ်ဖဵုမွဲသာ်တုဲ ညံၚ်ရဴတၟံကလောံနွံဒၟံၚ်ပ္ဍဲကတိုၚ်ဂှ်ကီုရ၊) ။

(၁၅) နှၚ်ထောၚ်ထောၚ်

ပုံအာဂီုတ္ၚဲဏံမၞုံယၟု(နှၚ်ထောၚ်ထောၚ်)မဒှ်ကီုရအဴ

နွံကာမွဲတ္ၚဲတေံဂှ်တှ်ေ မၚ်ဗၠာဲမွဲဂှ် ညးတေံဒးအာတုက်ကေတ်ဍာ်သွက်သ္ဂောံသုၚ်စောဲပ္ဍဲသ္ၚိအရာကေၚ်ကာနာလၟိုန်လၟိုန်တ္ၚဲရ၊ ဆဂးဂှ်တှ်ေ နှၚ်မွဲမဂှ်ထောၚ်ဒၟံၚ်တုဲ ၜိုန်တုက်နၚ်ဍာ်ကၠာအိုတ်ပေၚ်မံၚ်ကီုလေဝ် အခိုၚ်စိုပ်သ္ၚိဂှ်တှ်ေ နှၚ်မွဲလပါ်ဂှ်ပေၚ်ဒၟံၚ်တုဲ မွဲလပါ်ဏံဂှ်တှ်ေဍာ်ဟွံပေၚ်တုဲသှ်ေဒၟံက်ကွက်နှၚ်တွဵုတွဵုရ၊ ပ္ဍဲကဵုမွဲတ္ၚဲဂှ် နှၚ်ထောၚ်ထောၚ်ဂှ်လေဝ်ညးတေံစိုတ်ဟွံမိပ်ဟိုတ်နူထောၚ်ဒၟံၚ်တုဲ ညံၚ်ရဴကၠောန်ကမၠောန်ဟွံဍိုက်ပေၚ်ကဵုတၠသ္ၚိဇကုရ၊ လပါ်နှၚ်ဟွံထောၚ်မွဲလပါ်ဂှ်တှ်ေညးတေံစိုတ်မိပ်ဒၟံၚ်၊ အဃောဂှ်ဟေၚ်နှၚ်ထောၚ်ထောၚ်ဂှ်လေဝ်လုပ်အာကဵုတၠသ္ၚိဇကုတုဲဟီုတဴသာ်ဝွံကီုရ၊ ယွံလေဝ်နာဲသ္ၚိ အဲဏံစိုတ်ဟွံခိုဟ်စကွေံကွေံရ၊ လောန်ကၠုၚ်မွဲၜါဂိတုဏံဂှ် ပ္ဍဲနှၚ်အဲၜိုန်ရတုက်စုတ်ဍာ်ပေၚ်မံၚ်ကီုလေဝ် အခိၚ်စိုပ်သ္ၚိဂှ်တှ်ေ ဍာ်ပ္ဍဲနှၚ်သှ်ေဒၟံၚ်ကွက်ဂှ်တုဲ အဲစိုတ်ဟွံမိပ်ကီုရ၊ အေအခိၚ်ကာလဂှ်တှ်ေ တၠသ္ၚိဂှ်ဟီုကဵုနှၚ်ထောၚ်ထောၚ်ရဴသာ်ဝွံရ၊ ကၠုၚ်အဏံကၠုၚ်အဏံညိနှၚ်ထောၚ်ထောၚ်၊ တေတေံဗှ်ေကျောဝ်ရံၚ်စမ် သ္ကဲဍာန်လပါ်အဲဂၠေၚ်နၚ်ဍာ်နှၚ်ထောၚ်ထောၚ်ဗှ်ေဆဵုသေၚ်ပ္ကဴဂမၠိုၚ်ဍိုပ်ဍဴရာၚ်ဆာဲကျေဝ်ဂေါဝ်ဒၟံၚ်သ္ကဲဍာန်ရံၚ်စလုပ်မတ်ၜါကွေံကွေံရ၊ တၠသ္ၚိဂှ်ဟီုကဵုနှၚ်ထောၚ်ထောၚ်ဂှ်ရ၊ ဇေတ်ဇေတ်တေံဂှ်တှ်ေ အဲဏံရဒးတၚ်ဂုဏ်ကဵုနှၚ်ထောၚ်ထောၚ်ဂွံကဵုဍာ်ကဵုတၞံပ္ကဴနွံမံၚ်သ္ကဲဂၠံၚ်ဂှ်ဏောၚ်တီမံၚ်ဟာ။

ပုံအာဂီုဏံဝွံ ဗ္တောန်လဴထ္ၜးကဵုပိုဲကောန်ဂကူတံဟီုဂှ်တှ်ေ (ပရေံဗၠေတ်ပိုဲဏံဂှ်ဒှ်ဖဵုခိုဟ်သွက်ညးတၞဟ်လေဝ်နွံ၊ ဗၠေတ်ဒးညးတၞဟ်တံဂှ်ပၠန်လေဝ် ဟွံဒှ်ဖဵုသွက်လေဝ်ဒှ်မာန်မံၚ်ရ၊) ။

(၁၄) ကောန်သၟာဗ္ၚၜါကဵုအပါ

ပုံအာဂီုတ္ၚဲဏံမၞုံယၟု(ကောန်သၟာဗ္ၚၜါကဵုအပါ)မဒှ်ကီုရအဴ

နွံကာလမွဲတ္ၚဲတေံဂှ် နွံတဴဂကောံအိန်ထံၚ်ကောကဵုဒေံညးၜါသၟာဝါဗ္ၚဂှ် အပါးတေံစုတိချိုတ်အာတုဲ ကောကဵုဒေံညးၜါတိတ်အာဂွးကေတ်ထဝ်သြန်ပ္ဍဲကဵုကၠအ်တဵုလွဳလဝ်သၞေဝ်ကေဝ်တေံရ၊ အပါညးတေံဗ္ကန်လဝ်ကၠာဟွံဂွံချိုတ်ဏီဂှ်တှ်ေ အပါညးတေံအာတိုပ်စွံလဝ်ထဝ်သြန်ပ္ဍဲကဵုကၠအ်တေံကီုရ၊ ကောကဵုဒေံညးၜါစိုပ်အာပ္ဍဲကဵုကၠအ်သၞေဝ်တေံဂှ်တုဲ ဟေဒေံ ဒေံဂွးဒၞာဲဏံဏး အဲကောန်အာဂွးတေံလပါ်တေဴ၊ ညးၜါကောကဵုဒေံဂှ်လေဝ် ဂစာန်ဂွးဂၠာဲတဴထဝ်သြန်ဗီုအပါညးတေံဗ္ကန်လဝ်ဂှ်ရ၊ ညးၜါကောကဵုဒေံဂှ်လေဝ် ခဲါဂွးထောံဇၞာပ်ဒၞာဲသ္ကဲကၠအ်အိုတ်ကီုလေဝ် ညးၜါကောကဵုဒေံဂှ်ဟွံဂွံဆဵုကေတ်ထဝ်သြန်အပါညးတေံတိုပ်စွံလဝ်ဂှ်ရ၊ ရံၚ်ကေတ်တိကောကဵုဒေံညးၜါခဲါလဝ်တံဂှ်လေဝ် နူသၟဝ်ဒှ်လ္တူ နူလ္တူဒှ်သၟဝ်အတိုၚ်မွဲကၠအ်ဂှ်ရ၊ ဟိုတ်ဒှ်သာ်ဂှ်တုဲ သၞေဝ်ကေတ်တၞံသတ်ဆုသတ်ဒုန်နာနာနွံဒၟံၚ်ပ္ဍဲကဵုကၠအ်ဂှ်လေဝ် ဂွံဝါဲတိတၟိဂံက်ခိုဟ်ကွေံတုဲ ကျေဝ်တိုန်သက်ဟီုဟွံမွယ်ရ၊ ဟိုတ်ဒှ်သာ်ဂှ်တုဲ ညးၜါကောကဵုဒေံဂှ်ဂွံဆဵုကေတ်သၞေဝ်ကေဝ်တၞံဆုသတ်ဆုသတ်ဒုန်တံကျေဝ်တိုန်သတ်ကဴတိုန်တုဲ ဂွံၜှ်သွံရာန်တဴၚုဟ်မးခိုဟ်တဴတုဲ ဂွံပကောန်ကေတ်ထဝ်သြန်ဗွဲမဂၠိုၚ်ရ၊ ညးၜါကောကဵုဒေံဂွံတီကေတ်ကၠးကၠးဂှ်တှ်ေ အဵု ပိုန်ဒြပ်ထဝ်သြန်အပါပိုဲတိုပ်စွံလဝ်ဂှ် ဗွဲတၟေၚ်ဒှ်မံၚ်ဗီုဏံဏောၚ်သွံ။

ပုံအာဂီုဏံဝွံ ဗ္တောန်လဴထ္ၜးကဵုပိုဲကောန်ဂကူတံဟီုဂှ်တှ်ေ (မၞိဟ်တ္ၚအ်ကဵုကမၠောန်ဆာန်ကမၠောန်ကၠောန်ကမၠောန်တံဂှ်ဟေၚ် ဂွံကၠုၚ်ထဝ်သြန်ဗွဲမဂၠိုၚ်မာန်ရ၊ ဆဂး ကၠောန်ကမၠောန်လေဝ်ကၠောန်ကဵုဒးညိဏးကောန်ဂကူတံ၊ ယဝ်ကၠောန်ကမၠောန်ဟွံဒးမ္ဂးတှ်ေ တ္ၚအ်ကဵုကမၠောန်ပွိုၚ်စှ်သၞာံလေဝ် ဘဝဂှ်နွံဒၟံၚ်ဒၞာံတြေံဂှ်ရ) ။

(၁၃) ကောန်ဗ္ဂဲဒှ်ကဵုကၠ

ပုံအာဂီုတ္ၚဲဏံမၞုံယၟု(ကောန်ဗ္ဂဲဒှ်ရဲကဵုကၠ)မဒှ်ကီုရအဴ

ပ္ဍဲကဵုကွာန်ရးမွဲကွာန်ဂှ်နွံကြပ်မံၚ်ကဵုဂြိုပ်ကီုရ၊ ပ္ဍဲကဵုသ္ၚိအိန်ထံၚ်မွဲအိန်ထံၚ်ဂှ်လေဝ် ညးတံလွဳလဝ်ကောန်ဗ္ဂဲနွံတုဲ ကောန်ဗ္ဂဲတံဂှ်လေဝ် ကျေဝ်ဂေါဝ်ဆာန်လာန်ဍိုန်ၜိုတ်သာယာတဴဗွဲမလောန်ရ၊ ကောန်ဗ္ဂဲမွဲဂှ်လေဝ် ညးတေံအာဝေၚ်ဂၠာန်အာဂၠာန်ကၠုၚ်မံၚ်တုဲ လုပ်အာဌာန်ဂြိုပ်တေံဂှ်တုဲ ညးတေံဂၠာဲဂၠံၚ်စဴသ္ၚိဟွံဒးရ၊ ကောန်ဗ္ဂဲဂှ်လေဝ် ကွာ်အာပေၚ်ပြးသိုက်သိုက်တုဲသွက်သ္ဂောံဆဵုဂၠံၚ်ဍာန်စဴသ္ၚိတုဲ ဓဝါဲဂှ်ဂွံဆဵုကေတ်ကၠဗျုစိုတ်ခိုဟ်မွဲကီုရ၊ ( ဟေကောန်ဗ္ဂဲ မုပမံၚ်ရောပ္ဍဲကဵုဂြိုပ်ဏံဂှ်ရော၊ အန္တရာဲဂၠိုၚ်မံၚ်ဏောၚ်တီဟာ၊ ယဝ်ရစဴသ္ၚိဟွံဒးတှ်ေကၠုၚ်မံၚ်ကရောံအဲဏံညိကောန်ဗ္ဂဲ၊ ကၠဗျုစိုတ်ခိုဟ်ဂှ်ဟီုကဵုကောန်ဗ္ဂဲကလိၚ်ဂၠံၚ်ဂှ်ရ၊ ကောန်ဗ္ဂဲဂှ်လေဝ် ဇကုဂၠံၚ်ပိုတ်ဒၟံၚ်တုဲ ဒးဖျေံစိုတ်အာမံၚ်ကရောံယာဲကၠးဖျုစိုတ်ခိုဟ်ဂှ်တုဲ ဇၞော်ဂေါတ်တိုန်ကၠုၚ်မွဲစွံမွဲကရောံဂကောံကောန်ကၠတံအိုတ်ရ၊ ခြာဟွံလအ်ဟေၚ် ကောန်ဗ္ဂဲဂှ်လေဝ်ဒှ်ကၠုၚ်သ္ကံရဲကဵုကောန်ကၠတံဂှ်တုဲ အာကၠုၚ်ဂၠာဲစစၞလေဝ်မွဲစွံကဵုကောန်ကၠတံရ၊ အခိၚ်လအ်လအာကဵုသၞာံတုဲ နူစကဵုကောန်ဗ္ဂဲဍိုန်ၜိုတ်ဆာန်လာန်ဂှ်ဒှ်ကၠုၚ်ဗ္ဂဲဂြိုပ်မွဲရ။

ပုံအာဂီုဏံဝွံ ဗ္တောန်လဴထ္ၜးကဵုပိုဲကောန်ဂကူတံဟီုဂှ်တှ်ေ (ပိုဲမၞိဟ်တံပြံၚ်သၠာဲအတိုၚ်သဘာဝ အတိုၚ်မၚ်မွဲလွဳပရာကီုရ) ။

(၁၂) အဓိပ္ပါယ်ခရေၚ်စ

ပုံအာဂီုတ္ၚဲဏံမၞုံယၟု(အဓိပ္ပါယ်ခရေၚ်စ)မဒှ်ကီုရအဴ

သၟတ်တြုံမွဲဂှ် ညးတေံဒဳဏာကွဳစက်ကာလုပ်အာဍုၚ်အခိၚ်သဝ်တ္ၚဲဂှ်ရ၊ အဃောအဗၠာဲဂှ်ဒဳဏာကွဳစက်ကာဂှ်တှ်ေ ဂွံဆဵုကေတ်မိနော်ဗျုမွဲဂှ်ရပ်လဝ်ပၟတ်ခ္ဍိဂစိုၚ်ဂစိုၚ်ကုန်ကုန်ညံၚ်ရဴဂၠာဲတဴကပေါတ်အရာမွဲမွဲသာ်ဖါဲဒၟံၚ်အကြာချောဲသ္ကုဲဂၠံၚ်ကွဳစက်ဂှ်ရ၊ အဗၠာဲဂှ်ဂွံဆဵုကေတ်မိနော်ဗျုဂှ်တုဲ နကဵုသံသယဒိုအ်ကွဳစက်ကာတုဲလုပ်အာသၟာန်မိနော်ဗျုဇရာဂှ်ရဴသာ်ဝွံရ၊ ဟေမိနော်ဗျု မုမိနော်ဂၠာဲဖါဲဒၟံၚ်အရာလဵုမွဲရော? ၊ မိနော်ဗျုဂှ်ကလေၚ်သွဟ်ကဵုအဗၠာဲဂှ်တှ်ေ အဵု − မိနော်အဃောဂၠာဲဒၟံၚ်သြန်အတာန်စှ်မွဲမဒတုံစှ်ေအာအကြာချောဲဏံတုဲဂၠာဲရောဟွံဆဵုအဗၠာဲ၊ မိနော်ဂၠာဲဒၟံၚ်တၟာလအ်ရဟွံဆဵုဏီ၊ အဗၠာဲဘိုၚ်ဂၠာဲကဵုမိနော်ကီုဟာအဗၠာဲမိနော်ဂှ်ဟီုကဵုအဗၠာဲဂှ်ရ၊ နကဵုဓဝ်ဆာန်ဍူအဗၠာဲဂှ်တုဲ အဗၠာဲဂှ်ဂၠံက်ပ္တိတ်နၚ်သြန်အတာန်စှ်မွဲမနူထိုၚ်ပဠောအ်တုဲကဵုမိနော်ဗျုဇရာဂှ်တုဲ ဟီုတဴကဵုမိနော်ဂှ်တှ်ေ၊ မိနော်ကေတ်ဏာသြန်အဲဏံတုဲ သြန်မိနော်ဒ္တုံစှ်ေအာအကြာချောဲဂှ်လ္ပဆက်ဂၠာဲရ၊ တ္ၚဲလေဝ်ဂၠုလောန်အာတုဲစဴသ္ၚိဂွံရမိနော်၊ ဓဝါဲဂှ်မိနော်ဗျုဂှ်လေဝ်ကွာ်လုပ်အာကွာန်ကီုရ၊ အဗၠာဲဂှ်တိုန်အာဍုၚ်ကိစ္စဗၟိက်တုဲဒှ်ဟေၚ်ကလေၚ်စဴကၠုၚ်ကွာန်ဇကုပၠန်ရ၊ အခိၚ်စိုပ်ကၠုၚ်ပ္ဍဲတၞုၚ်ကွာန်ဂှ်ပၠန်တှ်ေ အဗၠာဲဂှ်ဂွံဆဵုကေတ်မိနော်ဗျုဂှ်ဂၠာဲဒၟံၚ်မသြန်အကြာချောဲဂှ်ပၠန်ရ၊ အဗၠာဲဂှ်စှ်ေအာတုဲသၟာန်တဴရ၊ မိနော်သြန်ဒ္တုံအာပၠန်ရဟာမိနော်၊ မိနော်ဗျုဂှ်ယာတိုန်က္ဍိုပ်တုဲ အဵုအဗၠာဲစိုတ်ခိုဟ်ဏံပၠန်ရဟာ သြန်မိနော်ဟွံဒ္တုံအာပုဟ်အဗၠာဲ၊ နဲဏံဂှ် ဒှ်နဲကဲမိနော်ဂၠာဲသြန်မွဲနဲခိုဟ်အိုတ်ရဏောၚ်အဗၠာဲ၊ အလန်ဏံတှ်ေအဗၠာဲလ္ပကဵုသြန်ကဵုမိနော်ဏံရဏး၊ မိနော်ဗျုဂှ်ဟီုတဴသာ်ဏံတုဲ ထပၠိုတ်ပၟတ်ဗက်ဂှ်ကွာ်လုပ်အာကွာန်ရ၊ မိနော်ဗျုဂှ်ထောံလဝ်အဗၠာဲဂှ်မွဲဓဝ်မတ်ဂၠုမံၚ်ဒၞာဲဂှ်ရ။

ပုံအာဂီုဏံဝွံ ဗ္တောန်ဟီုလဴကဵုပိုဲကောန်ဂကူတံဟီုဂှ်တှ်ေ (နဲကဲကၠောန်ကမၠောန်ဂၠာဲသြန်ဟီုဂှ် နဲညးကဵုညးနွံမံၚ်ဖအိုတ်ရ၊ ဆဂး နဲလဵုလေဝ်ကၠောန်တုဲတှ်ေ လ္ပကဵုဗၠေတ်သၞောဝ်ဍုၚ်ညိဏး) ။

(၁၁) ယာဲဂတာံဗ္တောန်ကောန်

ပုံအာဂီုတ္ၚဲဏံမၞုံယၟု(ယာဲဂတာံဗ္တောန်ကောန်)မဒှ်ကီုရအဴ

ယာဲဂတာံကဝါ်ဏာကောန်တံအာဂၠာဲစပ္ဍဲဗၠးသံၚ်ဗတဳဂှ်တုဲ ယာဲဂတာံဂှ်ဆဵုကေတ်ကောန်တံကွာ်ဂါဲဝါဲဂါဲဝါဲမံၚ်အိုတ်တုဲ ဟီုတိုန်ကဵုကောန်တံရဴသာ်ဝွံရ၊ မူပကောန်ကွာ်တပ်တပ်ဟွံဂွံဟာ၊ ကောန်ဂတာံတံကလေၚ်ဟီုကဵုမိယာဲဂတာံဂှ်ပၠန်တှ်ေ (မိယာဲကွာ်ထ္ၜးကဵုပိုဲကောန်တံဗဵုစမ်ရံၚ်ကၠာ ပိုဲကောန်တံကွာ်ဂွံရ)။

ပုံအာဂီုဏံဝွံ ဗ္တောန်ဟီုလဴကဵုပိုဲကောန်ဂကူတံဟီုဂှ်တှ်ေ (ဟီုတဴနကဵုအရေဝ်သၟးဂှ် ဗက်ကၠောန်ထ္ၜးနဇိုၚ်နတဲဟွံဂွံရ) ။

(၁၀) အခိၚ်ကၠဵုကိတ်

ပုံအာဂီုတ္ၚဲဏံမၞုံယၟု(အခိၚ်ကၠဵုကိတ်)မဒှ်ကီုရအဴ

အဗၠာဲမွဲဂှ်ညးတေံလုပ်စိုပ်ကၠုၚ်လဒေါဝ်ဖျာဇၞော်ပ္ဍဲဍုၚ်ဂှ်သွက်သ္ဂောံရာန်ကပေါတ်နာနာသာ်တုဲ ဒးကိတ်ကဵုကၠဵုနွံဒၟံၚ်ပ္ဍဲလဒေါဝ်အကြာဖျာဇၞော်ဂှ်ကီုရ၊ အဃောဂှ်ဟေၚ် မၞိဟ်မွဲတၠဂှ်ဟီုကဵုအဗၠာဲကၠဵုကိတ်ဂှ်သာ်ဝွံရ၊ ဟေအဗၠာဲ အဗၠာဲအာကေတ်နၚ်ကွာၚ်မွဲကလောံတုဲ ဆီနာဓဇူမံၚ်ဂှ်ဇုက်ထောံနကဵုကွာၚ်ကလောံဂှ်တုဲ ကဵုအာကၠဵုမကိတ်လဝ်အဗၠာဲဂှ်စထောံမ္ဂးတှ်ေစရနာဲဒးကိတ်လဝ်ဂှ်ဂျိအိုတ်အာတုဲဗၠးအာမာန်လောဲလောဲရ၊ အဗၠာဲကၠဵုကိတ်ဂှ်ဂွံမိၚ်ကေတ်သာ်ဏံတုဲ သီုအီဂြိုၚ်ကလေၚ်ဟီုတဴသာ်ဏံပၠန်ရ၊ (ယဝ်ရအဲကၠောန်သ္ပဗီုဏံမ္ဂးတှ်ေ ကၠဵုနွံဒၟံၚ်မွဲဖျာဇၞော်ဏံဖအိုတ်ဂှ် ကၠုၚ်လုပ်ကိတ်အဲရဒှ် ဟိုတ်နူကိတ်ဒးအဲတုဲဂွံစကွာၚ်။

ပုံအာဂီုဏံဝွံ ဗ္တောန်ဟီုလဴကဵုပိုဲကောန်ဂကူတံဟီုဂှ်တှ်ေ (သုၚ်စောဲသြန်ရာန်သၞသတြုမ္ဂးတှ်ေ ဂွံကၠုၚ်သၞသတြုတံပဵုဂၠိုၚ်တိုန်အရိုဟ်တ္ၚဲရ) ။

(၉) ကၞုဲအ္စာကျာ

ပုံအာဂီုတ္ၚဲဏံမၞုံယၟု(ကၞုဲအ္စာကျာ)မဒှ်ကီုရအဴ

သၟာတမ္ၚာမွဲဂှ် ညးတေံဖျေံမံၚ်ဇာပ္ဍဲကဵုပါၚ်ကြုၚ်ဂှ်တုဲ စိုပ်လဒေါဝ်တ္ၚဲညးတေံအာစပုၚ်သွရ၊ ကၞုဲမွဲဂှ်ဆဵုဒးတမ္ၚာဂှ်ပီုမံၚ်ကဖျေံမံၚ်ဇာပ္ဍဲကြုၚ်ဂှ်တုဲ ကၞုဲဂှ်ချပ်တိုန်ရဴသာ်ဝွံရ၊ အဵုဟွံကျာတ်ပုဟ်ၜိုတ်ဆဖျေံဇာပီုကရ၊ ဓဝါဲဂှ်ဟေၚ်ကၞုဲဂှ်စှ်ေနူလ္တူတၞံဆုဂှ်တုဲ အာကေတ်နၚ်ဇာသၟာတမ္ၚာဂှ်တုဲ ကၞုဲဂှ်စှ်ေအာကြုၚ်တံနကဵုဇာပီုကဂှ်ရ၊ အိုတ်ကၞောတ်ဂှ်တှ်ေ နကဵုပရေၚ်ဆဵုဂဗဟွံမွယ်နွံအောန်မံၚ်တုဲ ဇာဂှ်ပူဒက်စန်ဂွံဇကုကၞုဲဂှ်တုဲ ဗၠိုက်စှ်ေအာပ္ဍဲလဒေါဝ်ကြုၚ်ဂှ်ကီုရ။

ပုံအာဂီုဏံဝွံ ဗ္တောန်ဟီုလဴကဵုပိုဲကောန်ဂကူတံဟီုဂှ်တှ်ေ (အရာပိုဲတံဟွံတီဟွံကၠိုဟ်လဝ်ကၠးကၠးတံဂှ် ဗဒှ်ကဵုအန္တရာယ်ကဵုဘဝပိုဲဏံမာန်လောဲလောဲရ) ။